Cundizioni generale

Règule generale
Titulu di trasportu-Bigliettu
Règule d'imbarcu
Rispunsabilità è òbblighi particulari di u passageru
Rispunsabilità è diritti di u traspurtadore


Règule d'imbarcu
11) Prisentazione. U passageru, senza o cù veìculu, si deve prisentà per u portu à l'uffiziu d'imbarcu in u tempu accennatu in e pubblicazioni (biglietti, orarii, tariffi è altri avisi) in corsu di validità : trascorsu quellu tempu, u passageru si perde ogni dirittu à l'imbarcu.
12) Veìculi. Qualessa sia l'ora di prisentazione di u passageru, u traspurtadore è/o u cummandante è/o l'agenti incaricati di l'imbarcu anu a facultà d'urganizà à parè soiu l'ordine d'imbarcu di i veìculi. In casu di scambiu d'orarii, di nave, o per causa di forza magiore, chì u traspurtadore ùn possi imbarcà un veìculu puru riservatu è prisentàtusi in règula, stu veìculu hà priurità d'imbarcu nantu u viaghju pròssimu senza chì u passageru pudessi chere qualsìasi spesa di cumpensu. Sè à l'arrivu à u portu di destinazione, e cundizioni di mare o altre cause indipendenti da a vuluntà di u traspurtadore ùn permettèssinu u scalu di i veìculi, serèbbenu sbarcati questi u più prestu pussibule, à u portu di destinazione o quellu di pròssimu scalu, senza chì u passageru possi pretende à qualsìasi spesa di cumpensu. In casu di falza dichjarazione di misure di u veìculu, u traspurtadore si tene u dirittu di ricusalli l'accessu à bordu è/o d'incascià a diferenza per i veìculi fora di misura. L'uperazioni d'imbarcu è di scalu dèvenu esse fatte da u passageru, chì cunducerà ellu u so veìculu propriu. I veìculi dèvenu esse purtati sin'à l'usciu di u garagiu (à l'entrata di a nave in casu d'imbarcu, à a surtita in casu di scalu) sottu a sana è sola rispunsabilità di u cunduttore chì duverà rispettà tutte e règule di sicurezza chì gestìscenu a circulazione nantu i moli purtuali. Hè difesa di staziunà à menu di 50 m da a nave durante l'uperazioni d'imbarcu è di scalu. À l'internu di a nave duverà u cunduttore ingarà u so veìculu secondu l'istruzioni date da u persunale di bordu. L'altri passageri non-cunduttori duveranu imbarcà à pedi, usendu e vie per elli stabbilite. I veìculi imbarcati duveranu esse lasciati chjosi à chjave, frenu à manu stinzatu è vitezza incruchjata.
13) Bagaglii. Ogni passageru hà u dirittu à u trasportu gràtisi di i so bagaglii à manu. Dèvenu cuntene quessi solu effetti persunali. E misure lìmite accettate sò di 200 cm d'altu, 100 cm di largu è 50 cm di fondu. Bagaglii fora di misura cum'è canoë, kayak, etc ... s'elli ùn sò messi sopr'à u veìculu dèvenu esse posti in garagiu è seranu sottumessi à spese da pagà in partenza à l'uffiziu d'imbarcu o ancu à bordu. U passageru pò purtà i so bagaglii in cabbina o à u postu per ellu signalatu, sottu à a so rispunsabilità. U traspurtadore ricusa ogni rispunsabilità in casu di bagaglii arrubbati, smarriti o rotti.
14) Salute di i passageri - Donne incinte :
Salute di i passageri :
Ogni cundizione particulare di salute deve esse dichjarata à tempu à a riservazione. U traspurtadore pò ricusà l'imbarcu à i passageri chì averebbenu bisognu d'una assistenza particulare durante u viaghju, postu chì solu in casu d'urgenza hè abbilitatu u duttore di bordu à purtà assistenza. S'ellu presenta u passageru un certificatu medicale fattu in cundizione, è chì stabbilisce ch'ellu ùn hà nisun'bisognu d'assistenza medicale particulare durante u viaghju, u traspurtadore tandu u ferà imbarcà, ma ricusendu ogni rispunsabilità riguardu à ellu. In soprapiù, u cummandante hà tuttu pudere di ricusà l'imbarcu à ogni persona di cundizioni fìsiche o mentale ch'ùn li permetterebbenu micca di viaghjà, o à ogni persona di cumpurtamentu periculosu pè l'altri passageri, per via di troppu cunsumazione di droga, bienda alcòlica o robba allucinatoghja. In tutti quelli casi mintuvati più sopra, u passageru ùn si puderà francà di a so rispunsabilità pè i danni à ellu stessu cagiunati, à a nave, à ogni so attrezzu o ghjente d'equipaggiu, à ogni persona terza quant'è à a so robba. U fattu chì u passageru sia accettatu à bordu da u traspurtadore ùn duverà esse cunsideratu dopu cum'è u rinunciu à qualsìasi dirittu à sprime e so riserve sopr'à u statu di u passageru, cunnisciutu da u traspurtadore o micca, à u mumentu di l'imbarcu è/o di a partenza di a nave.
Donne incinte :
E donne incinte ch'anu compiu u seièsimu mese di gravidenza devenu esse ubbligatoriamente pruviste d'un certificatu medicale ch'auturizeghja u viaghju, da prisentà à ogni dumanda di u persunale di bordu. In casu di gravidenza cù cumplicature di salute, a passagera incinta duverà esse ubbligatoriamente pruvista d'un certificatu medicale ch'auturizeghja u viaghju, quale ellu sia u mese di gravidenza. In soprapiù, u cummandante hà tuttu pudere di ricusà li l'imbarcu. U fattu chì a passagera sia accettata à bordu da u traspurtadore ùn duverà esse cunsideratu dopu cum'è u rinunciu à qualsìasi dirittu à sprime e so riserve sopr'à u statu di a passagera, cunnisciutu da u traspurtadore o micca, à u mumentu di l'imbarcu è/o di a partenza di a nave. A passagera ùn si puderà francà di a so rispunsabilità pè i danni à ella stessa cagiunati, à a nave, à ogni so attrezzu o ghjente d'equipaggiu, à ogni persona terza quant'è à a so robba.
15) Animali. Sò accettati l'animali à bordu è ponu accumpagnà u passageru in tutte e sale pùbbliche, fora di l'osterie. U persunale di bordu puderà quantunque limitalli l'accessu à certi lochi. Pò esse richiestu un certificatu di vaccinazione è bona salute di menu di 3 anni di validità. Hè ubbligatoriu di tene i cani ligati è cù a musarola.



Sèguita