Corsica Ferries è l'Aiutu Suciale

Secondu i detti di u presidente di l'Uffiziu di i Trasporti ripigliati da a stampa, u Cunsigliu Esecutivu di Corsica vole prupone :

• A fine di l'Aiutu Suciale addirizzata à i passageri.
• L'allarghera di a delegazione attuale di serviziu pùblicu chì vale per Marseglia, da valè ancu per Tulò.
• L'allongu di durata di a delegazione di serviziu pùblicu, da passà à 12 anni.

In corte parolle, rivene à dì :

• A sparita di l'uperatori attuali in Tulò, è a sclusività data à long'andà à « l'uperatore stòricu » nant'à e ligne di Marseglia.
• A calata di e frequenze frà Nizza è a Corsica.
• A crèscita di i prezzi per i passageri chì oghje gòdenu l'Aiutu Suciale, vale à dì circa 100 € di crèscita per u pass'è vene d'una famiglia cù 2 zitelli.

Difatti si tratta di lampà à caternu un sistema efficace è di pocu costu per un altru, ruinosu è senza effettu. Vole dì :

• Scelta ridotta è trasporti più cari.

È puru :

U sistema di l'Aiutu Suciale ùn costa nunda à a Cullettività Territuriale di Corsica :
Ogn'annu a CTC accansa 16M€ à prò di l'aiutu à i passageri. In tornacontu, incascia 16,4M€ di tasse purtuale è di trasportu.

Invece, u sistema di delegazione di serviziu pùblicu costa guasi 100M€ à l'annu à a Corsica, ma di sicuru, bisogna à mantènelu !

U sistema di l'Aiutu Suciale à i passageri hè statu decisu è messu in ballu da a Cullettività Territuriale di Corsica di 2001.

• Uffiziu di i Trasporti di Corsica

Duie volte hè statu cunvalidatu da a Cummissione Auropea stu sistema d'aiutu addirizzatu à i passageri chì n'anu u dirittu per via di a so categurìa (residente corsu, senior, giòvani, studienti, passageri invàlidi o di poca mubilità).

• Prima decisione di a Cummissione Auropea
• Seconda decisione di a Cummissione Auropea

Permette d'abbassà u costu di trasportu di 12 € à passageru (15 € prima), per i viaghji frà Corsica è Tulò/Nizza.
S'addirizza à u passageru qualsìasi a cumpagnìa ch'ellu hà sceltu, basta chì quessa rispetti l'Òblighi di Serviziu Pùblicu (OSP) riguardu a so frequenza nant'à e ligne (ad esempiu, presenza richiesta ancu d'inguernu).

Stu sistema d'aiutu hà permessu a creazione di u tariffu residente corsu (146€ TTC per un pass'è vene di ghjornu, un passageru è un veìculu, o 216 € TTC per un pass'è vene di notte in cabina interna, qualsìasi a data, basta ch'ellu sia riservatu à u più prestu 15 ghjorni prima di a partenza à l'andà, finament'à a vigilia di a partenza. U sugiornu in cuntinente deve esse limitatu à 16 ghjorni. (Vede e cundizioni).

Hà permessu dinò à più di 7,5 milioni di passageri di pudè viaghjà à tariffu ridottu dipoi u 2002, è hà cagiunatu à tempu una crèscita sprupusitata di a vìsita turìstica in Corsica.

Ma oghje l'Aiutu Suciale hè minacciatu ...

Appena di lettura, per sapenne di più :

• Scruttatore Regiunale di i Traspurti di a Corsica
• Studiu di u Tràfficu marìttimu in Tulò fin'à u 2005

u 9 di marzu di u 2010.

Corsica Ferries sustene l'idea di a missione parlamentaria :

- Corsica Ferries piglierà una parte bella attiva in quella missione parlamentaria cundutta da u senatore Charles Revet.

A Cumpagnìa hè d'accunsentu cù i so scopi palisati « d'analizà i sistemi d'aiutu pùblicu è sè bisogna, di mette in sesta l'adattazione di quessi, da chì a cuncurrenza frà e cumpagnìe sia ghjusta ». Ma postu chì si tratta d'affari impurtantìssimi, cunsidereghja chì à una cundizione sola sta missione averà qualchì sensu :

Hè assulutamente necessaria chì sia presente dinò frà i so scopi l'anàlisi di cum'elle sò state avviate a crèscita di capitale è a messa à u privatu di a SNCM per a paglia di 280 M € tocchi da l'azziunariu privatu chì oghje ghjornu gestisce a SNCM. Di fatti, rimettendu à gallu a SNCM, tutti sti soldi pùblichi anu postu un colpu fatale à a cuncurrenza frà e cumpagnìe, è sempre ancu oghje si ne parla postu chì s'aspetta una decisione di a Corte Auropea di Ghjustizia à stu sugettu.

À mez'à un cunflittu sindicale duve certe voce chjàmanu à a fine di l'Aiutu Suciale, Corsica Ferries vole ramintà quì i scopi, i risultati è i paragoni di sti dui sistemi d'aiutu pùblicu oghje in usu :

- Dui sistemi di cuntinuità territuriale chì si cumplèttanu :

A Delegazione di Serviziu Pùblicu, per e partenze da Marseglia, hè prevista per assicurà una parte di u tràfficu di mercanzìe versu a Corsica, è di i passageri versu i porti di Corsica detti secundarii, duve chì ùn pò vive à livellu ecunòmicu nisun'attività propriu privata.
L'aiutu suciale di 15 € à passageru, vutatu da l'Assemblea di Corsica di 2001, hà scopu di fà calà i prezzi, stimati troppu alti, da chì i residenti corsi pòssinu barcà u mare cù più facilità versu u cuntinente, è d'aiutà u sviluppu di u turìsimu, cibu principale in Corsica.

- 114 M € + 2 M € da una banda, 18 M € da l'altra :

Di 2009, SNCM è CMN s'anu chjappu 114 M € à contu di a Delegazione di Serviziu Pùblicu in partenza da Marseglia. I passageri di Corsica Ferries anu risparmiatu 18 M € à contu di l'Aiutu Suciale accunsentutu per e partenze di Nizza è Tulò. Di sicuru, tutte e cumpagnìe presente nant'à ste ligne essendu involte in u sistema di l'Aiutu Suciale, SNCM hà toccu anch'ella più di 2 M € per partenze da Nizza.

- Un passageru DSP costa 100 €, un passageru Aiutu Suciale ne costa 10 € :

Corsica Ferries trasporta 1.870.000 di passageri frà u cuntinente francese è a Corsica, « aiutati » per 18 M €, mentre chì e cumpagnìe SNCM è CMN ne traspurtèghjanu 1.126.000 pigliendu 114 M €. Femu u contu : l'aiutu suciale trasporta 1,5 volta di più passageri è costa 6 volte menu caru ch'è a delegazione di serviziu pùblicu. S'omu guarda solu u serviziu « di punta », vale à dì u serviziu aiutatu da a DSP per u trasportu di i turisti in alta stagione, à prò di SNCM è solu ella, u passageru costa 100 € à a cullettività, da paragunà à 10 € à passageru per l'aiutu suciale ...

- L'Aiutu Suciale hà sviluppatu u tràfficu ;

Difatti, ne prufitta u passageru, micca l'armatore. Corsica Ferries riporta st'aiutu sanu sanu di 18 M € à i passageri, calendu i so tariffi di 16 % dipoi u 2002, è cusì permette a nàscita di novi tippi di clienti è u sviluppu tamantu di u tràfficu, cresciutu di + 1 M di passageri dipoi a messa in ballu di l'aiutu suciale. Analizendu a crèscita di u tràfficu frà u 2011 è u 2009, omu mette in risaltu chì tutti i porti sò in crèscita : Marseglia (+6 ,7%), Nizza (+20,3%), Tulò (+183,4%) ... Tandu, ciò chì unipochi chjàmanu « cuncurrenza disunesta », ùn serà po micca ghjilusia ?... Cù sta crèscita di u tràfficu, hà dinò fattu un bellu passu in davanti l'ecunumia turìstica in Corsica. È per via di a cuncurrenza, i prezzi sò calati ancu in Marseglia, mentre ch'in tempi di monopolu, ùn fecìanu ch'è cresce.

- Corsica Ferries hè in favore di u serviziu pùblicu :

Di sicuru serà necessaria di cunsacrà soldi pùblichi quandu chì l'impresa privata ùn ci a face à risponde à l'interessu generale. Ma serà sempre necessaria chì guasi 40 M € di DSP ghjòvinu à finanzà u tràfficu in alta stagione (u serviziu dettu « di punta »), quandu chì a dumanda di clienti sola sola basta à finanzà l'attività di trasportu ? Oghje hè mal'adattu u sistema, custosu troppu è dannosu per a cuncurrenza. A saperà Corsica Ferries, quandu chì di 2007 fù candidata à a chjama d'offerta per a DSP, prupunendu un'offerta menu cara à 50 % di pettu à u so cuncurrente ...

- Corsica Ferries assicureghja una missione vera di serviziu pùblicu :

Ramintemu quantunque chì, ancu à Corsica Ferries tocca à rispettà òblighi di serviziu pùblicu cum'è tariffi livellati è frequenze di viaghji. Per Corsica Ferries, u spìritu di serviziu pùblicu, ghjè mèttesi à u serviziu di tutti è stà à l'ascoltu di i clienti, riguardu i prezzi è a quantità d'offerta, per esempiu. In u 2010, a Cumpagnìa prupunìa, fattu mai accadutu, 5,8 M di piazze nant'à i so battelli da Tulò è Nizza versu a Corsica è 8,8 M di piazze versu l'Italia, cù più di 5000 traversate à u tuttu. Pigliemu nota chì ella sola prupone traversate Nizza-Bastia è Nizza-Aiacciu d'inguernata. SNCM cala a so offerta cù 259.000 piazze di menu in u 2010 da Marseglia, ... ma tocca sempre listessa quantità di soldi di DSP. In u frattempu, face cresce a so offerta da Nizza cù 395.000 piazze in più in alta stagione, ... è cusì tocca l'Aiutu Suciale à i passageri.

- Corsica Ferries hè in favore di un cuntrollu rinfurzatu di l'Aiutu Suciale :

Da listessi sumeri si sèntenu dinò certe runcate rispett'à a mancanza di cuntrollu di l'Aiutu Suciale ... Ci vole à sapè chì a verìfica d'ogni passageru prevista à l'iniziu, prestu prestu fù troppu pisiva è troppu custosa da assestà per l'Uffiziu di i Trasporti di a Corsica. Tandu l'Assemblea di Corsica stabbilì una lìmita, vale à dì chì ogni cumpagnìa pudia cunsiderà 65% di u so tràfficu à u più essendu cumpostu da passageri sugetti à l'Aiutu Suciale. È fù propriu SNCM à dumandà a messa in sesta di stu sistema per i so viaghji di Nizza ... Di nuvembre scorsu hè statu vutatu da l'Assemblea di Corsica una nuvella lìmita à 16 M €, vale à dì una calata di 23 % di l'Aiutu Suciale mentre chì a DSP l'anu calata solu di 6 % ... Sia cum'ella sia, Corsica Ferries hè disposta à ragiunà nant'à qualsìasi mezu di megliurisce u cuntrollu di st'aiutu.

Corsica Ferries vole risponde à unipochi di falzi accusi :

- Corsica ferries hè cumpagnìa francese.

Nata in Bastia di 1968, a so sede l'hà in Bastia dipoi ch'ella hè nata, è i so conti vènenu posti tutti l'anni à u Tribunale di Cummerciu di Bastia. A so holding l'hà in Sguìzzera duv'elli stanu l'azziunarii, chì fàcenu parte di a famiglia di u fundatore è presidente di a Cumpagnìa, Pasquale Lota. A Cumpagnìa trasporta i passageri sottu bandera taliana secondu a lege auropea di u 1999 rispett'à u liberame di u cabutagiu auropeu in u Mediterraniu, apertu à tutte e bandere di a Cumunità auropea, cusì per apre a cuncurrenza à u marìttimu quant'è à l'altri settori ecunòmichi.

- L'età mezana di i battelli di a Cumpagnìa frà Corsica è cuntinente hè di 21 anni :

Da paragonu, l'età mezana di i battelli di SNCM hè di 17 anni. Ma parlemu piuttostu di a natura di sti battelli : Quante volte u Scruttatore Regiunale di i Trasporti di Corsica hà mintuvatu chì quella scelta di a Cumpagnìa di ferries di l'ùltima generazione, cum'è i Mega Express (età mezana 14 anni), hà cagiunatu in tuttu i tanti nuvelli passageri venuti in Corsica dipoi u 2001. I capimachja successivi di SNCM, frà quale u Statu, ùn sò stati capaci o ùn anu vulsutu adattà i so battelli in antivista di quell'apertura à a cuncurrenza, puru sappiuta da tutti ...

- Dumping suciale ùn ci n'hè :

À spessu còrrenu e vuciate nant'à e diferenze di lege suciale frà e bandere francese è taliane ... Sìamu chjari : Nant'à tutti i viaghji frà Corsica è cuntinente francese vènenu appiecate e cunvenzioni cullettive francese, vale à dì più di a metà di u tràfficu di a Cumpagnìa. E cundizioni di travagliu di i marinari di Corsica Ferries sò cuntrullate à spessu da a Direzzione di l'Affari Marìttimi in Marseglia. Hè vera ch'in Italia sò più basse e càriche suciale nant'à l'impieghi di i marinari, è tassate di menu l'attività di l'armatori, in u scopu di mantene una flotta naziunale, ma ùn ci vole micca à crede : Listessu fàcenu l'auturità francese, è quale ne prufitta ? SNCM è CMN ...

Speremu chì ste « duie verità » ghjuveranu à quelli ch'in tempi eletturali anu asgiu à sprìmesi, è dinò à quelli ch'in futuru piglieranu decisioni impurtantìssime per l'avvene di i trasporti è di l'ecunumia di a Corsica.

À parè nostru, pruclamà oghje « DSP contr'à Aiutu Suciale », ghjè vede u serviziu pùblicu di modu curpuratistu, ghjè ricusà di palisà i benefizii di l'Aiutu Suciale, ma sopratuttu, serebbe un colpu fatale tiratu à sè stessu, è contr'à l'ecunumia turìstica di a Corsica.

26 di ferraghju di u 2010.